Gary Neville: "Arsenal ifise amahirwe menshi yo gutwara Premier League kurusha Champions League

Gary Neville, myugariro wa kera wa Manchester United, ubu akaba ari umusesenguzi kuri Sky Sports yemeje ko Arsenal ifise amahirwe menshi yo gutwara igikombe ca Premier League uyu mwaka kuruta uko yotahana igikombe cayo ca mbere ca Champions League. Neville asanga urugendo rwa "Gunners" mu Buraya ruzorangirira mu gice ca kabiri (semi-final) bagiye guhuramwo na Atletico Madrid, naho abona ko bashobora gutsinda Manchester City mu guhiganirwa igikombe ca hano mu Bwongereza.

Intambamyi ya Atletico Madrid

Arsenal irerekeza muri Espanye ku wa Gatatu mu rukino rwa mbere rwa semi-final, ariko Neville abona ko abasore ba Diego Simeone bazobabera intambamyi ikomeye. Neville yavuze ati: "Abakinyi benshi ba Arsenal ntibazi ingene batsindira Champions League... naho Mikel Arteta akwiye gukina inkino zose nka finale, arazi ko Premier League ari yo yoroshe kuyishikira kuruta Champions League uyu munsi."

Neville yongeyeko ko imigwi nka Bayern Munich na Paris Saint-Germain isigaye muri rirya higanwa itokorohera Arsenal iramutse irenganye Atletico

Ubukomezi mu kugarira n’ibibazo mu gusatira

Naho Arsenal yasubiriye ku ntebe ya mbere ku wa Gatandatu mu gutsinda Newcastle 1-0 ikoresheje igitsindo ca Eberechi Eze, Neville yavuze ko uburyo bakinyemo mu gusatira butari bwemeza. Arsenal yerekanye "xG" (ibitsindo vyitezwe) ya 0.64 gusa, ivyo bikaba vyateye impungenge ku bijanye n'inguvu zabo imbere y'izamu.

"Kugarira kwabo kurashimishije cane, bariruka cane kugira bagume mu mwanya wabo kandi bariteguye neza. Ivyo ni vyo bishobora kubaha igikombe ca Premier League, kuko uburyo bugarira buhambaye cane," ni ko Neville yarangije ashimagiza ukwihangana kw’inyuma kwa Arsenal.