Ibivugwa muri Barcelona: kwambika isoni Real Madri, gutwara LA LIGA n'imigambi ya kazoza

Icitonderwa: Iyi nkuru si iyacu, twebwe twayihinduye gusa mu rurimi rw'Ikirundi. Iyi nkuru yanditswe na Laia Cervelló Herrero wo mu kinyamakuru The Athletic.

Murakaza neza mu rukurikirane rwacu rushasha rwa "Inside Barcelona", urukurikirane ruzokwama rubashikiriza amakuru mu kiringo cose c'ihiganwa rya La Liga ry'umwaka wa 2025-26.

Tuzokwamara turabashikiriza amakuru nyamukuru hamwe n'isesengura ku bibazo bishushe vyerekeye ikibuga ca Camp Nou n’umugwi wa Barca, mu kubaha amakuru yizigirwa mu kiringo urusaku ruba ari rwinshi mu vyerekeye uyu mugwi. Ivyanditse muri iyi nkuru bishingiye ku biganiro vyinshi n’abantu batandukanye bari mu mugwi wa Barcelona, bose bakaba basavye ko amazina yabo atashirwa ahabona kugira babungabunge imigenderanire yabo n’umugwi.

Ni izihe ngingo nyamukuru ziriko ziravugwa muri FC BARCELONA muri aka kanya

Inyuma y’aho ikuwe mu gikombe ca Champions League na Atletico Madrid, intumbero nyamukuru ya Barcelona ubu ni ukugaruka ku ntebe y’ubwami muri Espanye. Inyuma y’aho Real Madrid inganyirije na Real Betis, Barcelona igatsinda Getafe 2-0, ubu hariho ikinyuranyo c’amanota 11 hagati y’iyo migwi ibiri.

Igikombe kizotwarwa ryari?

Hansi Flick n’abakinyi biwe bafise inzira zibiri zo gutwara igikombe:

1. Mu ndwi iza: Barcelona niyatsinda Osasuna ku wa Gatandatu, maze Real Madrid ikananirwa gutsinda Espanyol ku wa Mungu.
2. Muri El Clasico: Real Madrid niyatsinda Espanyol, Barcelona yoshobora gutwara igikombe mu rukino ruhambaye rwa El Clasico ruzoba ku wa 10 Rusama.

Ibi bituma abafana n'abakinyi bibaza: Twokwemera kugitwara vuba kugira ngo Real Madrid itwambike icubahiro (guard of honour) muri Camp Nou? canke twokwirinda kugeza El Clasico kugira tuze tugitwarire imbere y'amaso yumukeba wacu?

Ibindi bihambaye Flick arindiriye

Flick ntabona igikombe gusa, hariho n’ibindi bintu ashaka gushikira:

• Amanota 100: Barcelona ishobora gushikira aka gahigo kigeze gushirwaho na Tito Vilanova muri 2013 hamwe na Jose Mourinho muri 2012.
• La Masia: Flick arashaka gukoresha abakinnyi 11 bose bavuye mu rwaruka rwa Barcelona (La Masia) mu rukino rumwe, nk’uko vyigeze kugenda muri 2012.

Inyuma y’imvune ya Lamine Yamal

Imvune ya Lamine Yamal yaje ari ikintu kibabaje, kuko uyu musore w’imyaka 18 atazokwongera gukina muri uyu mwaka w’inkino (naho yitezwe mu Gikombe c’Isi).

• Roony Bardghji: Uyu musore w’imyaka 20 ni we Flick ariko aragerageza mu kibanza ca Yamal.
• Marcus Rashford: Naho yatsinze igitsindo mu rukino rwa Getafe, amakuru avuga ko Barcelona itagishaka kumugumiza mu mugwi inyuma y’aho intizanyo yiwe izoba irangiye.

Ibibazo biri imbere mu ci

Naho igikombe ca La Liga kiri hafi gutwarwa, hariho ibibazo bikomeye mu buyobozi:

• Robert Lewandowski: Uyu mukinyi w’imyaka 37 amasezerano yiwe azorangira mu minsi iri imbere. Umugwi ushaka kumugumya ariko bakagabanya umushahara wiwe kandi nk'umusubirizi

• Uburyo bw’amafaranga: Barcelona iracafise ikibazo c’amategeko ya La Liga (1:1 rule), bituma batashobora kugura abakinyi bashasha batabanje kugurisha abandi.

• Imvune: Abayobozi b’umugwi barahangayikishijwe n’ingene imvune zabaye nyinshi muri uyu mwaka, bituma umugwi utagira inguvu zikwiye mu nkino zihambaye.

Incamake y'urukino rwa Getafe:

Barcelona yerekanye kwihangana kudasanzwe mu gutsinda Getafe, urukino rwagaragayemwo kugaruka muri fomu kwa Pau Cubarsi na Pedri. Fermin Lopez na we yerekanye ko ari inkingi ya mwamba mu gusatira, naho yari yambaye mask.