Umukuru w’igihugu ca Amerika, Donald Trump, yamenyesheje ko umugwi nserukiragihugu wa Iran uhawe ikaze muri Amerika mu gikombe c’isi kigiye kuba muri rino ci. Naho biri uko, yababuriye ko kuza kwabo gushobora gushira "ubuzima n’umutekano wabo" mu kaga, bitewe n’amatati n’intambara biriko birahuza ivyo bihugu vyompi.

Ibi bishitse mu gihe Amerika imaze imisi itera amabombe muri Iran, bikaba vyatumye abategetsi ba Iran batangaza ko uwo mugwi wabo "udashobora" kwitabira izo nkino.

Ubutumwa bwa Trump kuri Truth Social

Trump akoresheje urubuga ngurukanabumenyi (Truth Social), yishuye ku majambo yari yavuzwe n'ubutegetsi bwa Iran. Yavuze ko umugwi wa Iran uhawe ikaze mu gikombe c’isi, ariko yerekana ko bitabereye ko baza kubera amagara yabo. Yanditse ati:

"Umugwi nserukiragihugu wa Iran urahawe ikaze mu gikombe c’isi, ariko mbona ko bitabereye ko baza kubera umutekano n’ubuzima bwabo. Murakoze kumva iki kibazo! Perezida DONALD J. TRUMP."

Indyane mu buseruko bwo hagati n’ibitero vy’indege

Ibi bivuzwe mu gihe Amerika na Isirayeli batanguye gutera amabombe muri Iran ku wa 28 Ruhuhuma. Kuva ico gihe, abantu bashika 1,200 bamaze gupfa mu ndwi zibiri gusa. Ikindi gituma ibintu biba bibi ni igitero catewe kw’ishure ry’abigeme ku wa 1 Ntwarante, aho abantu 175 bahasize ubuzima.

Kubera ivyo, Iran yasavye ishirahamwe ry’umupira w’amaguru kw’isi (FIFA) gufatira ibihano Amerika, ivuga ko ari igihugu kitubahiriza amategeko kidakwiye kwakira inkino nk’izo.

Kugeza ubu, umugwi wa Iran uteganijwe gukina na New Zealand ku wa 15 Ruheshi muri California, uce ukina na u Bubiligi ku wa 21 Ruheshi, maze usozere ukina na Misiri muri Seattle ku wa 26 Ruheshi. Ariko ubu amerekezo y’uwo mugwi ntiyorohejwe kubera ayo majambo ya Trump